Facebook CCCL :: Children's Cancer Center of Lebanon :: Patient's Stories :: معجزة برتبة مينيرفا
CCCL :: Children's Cancer Center of Lebanon - Logo

معجزة برتبة مينيرفا

١٠ عمليات.
١٣٥ جلسة علاج كيميائي.
٢٠٠٠ حبة دواء.
١٠٩٥ يوم.
٣ سنين.
٣ مرات خسرت كل شعرها.
وكتير كتير دموع.


هيدا يلي كتبته مينيرفا:

"٣ سنين تعب .. ٣ سنين وجع.. ٣ سنين عذاب .. بس كمان ٣ سنين امل و ايمان و صبر .. ٣ سنين اهل و اصحاب و حب ما بيتقدر بثمن .. ٣ سنين امتحان من الله ،و شو حلو هالامتحان !!
شو حلو لما تشوف اصحابك و اهلك و رفقاتك حدك باصعب مرحلة عم تقطع بحياتك!!
شو حلو تتقرب من ربّك و تشكرو على كل شي و شو حلو لما تعرف انو الله هوي السند الوحيد بالحياة و انو ع قد ما بحبك ع قد ما بجربك !! شو حلو لما تنوجع و تتعذب و توصل عالموت و ترجع و ما تلاقي الّا ربك معك و انو ما بيتركك حتى بأصعب الحالات ..
ما اجمل ابتلاء الله و ما اقبحك يا سرطان!!"


بس تفكروا بصعوبة الحياة، فكروا بمينيرفا.
بس تفكروا بقوة الإيمان، فكروا بمينيرفا.
بس تفكروا بيومياتكن فكروا بأهلها واصحابها لمينيرفا.


لتقطع صبية حلوة بكل هيدا وتضل تقدر تبتسم وتضحك هي معجزة.
معجزة برتبة مينيرفا.


١٠ عمليات، ١٣٥ جلسة علاج كيميائي، ٢٠٠٠ حبة دواء، ١٠٩٥ يوم، ٣ سنين، ٣ مرات خسرت كل شعرها والمركز ما تركها. شكرا لكل داعمين المركز لأنو ما تركتونا لنقدر نحن نكون حدها لمينيرفا، دايماً.