Facebook CCCL :: Children's Cancer Center of Lebanon :: Patient's Stories :: قصة علي
CCCL :: Children's Cancer Center of Lebanon - Logo

قصة علي


طلع معه لوكيميا!
وصرنا كل نهار جمعة، نروح على مستشفى الزهراء لنعمل فحص لعلي ولياخد علاجه الكيماوي.

علي عمرو 3 سنين و6 شهور، وب 24 نيسان الماضي بعد ما كان لونه مايل للإصفرار وجسمه يبيّن عليه كدمات، ومن بعد فحوصات طبيب الأطفال، طلعت نتيجة الخزعة، وطلع علي معو لوكيميا (سرطان الدم). هيك قالت ستّه لعلي. وعن احساسها لما اكتشفت انو علي معو سرطان قالت ودمعة بعينها: “ما ضروري احكي. الكل في يتخيل شو حسّيت.”

كنا بالأول نروح ناخد ادوية من مستشفى الكرنتينا ودايماً يكونو ناقصين، مقطوعين او ما في منن. نحن نرجع نشتري لنكفي علاج الشهر. هيدا الوضع كان كارثي علينا لأنو ابني بلا شغل، والأدوية كتير غالية. وهلق بالإنفجار تدمرت مستشفى الكرنتينا.

وبالإنفجار كمان خسرت ابن خيي. كان عمرو 19 سنة. كان اسمه ابراهيم. ابراهيم ضل 4 ايام تحت القمح بمبنى الإهرائات.

شو ذنب هالشباب والأطفال، وشو ذنب عيلة آمنة توقع عليها المصايب مرة وحدة!؟ “بتحس انو كل الدني مصايب وما في امل.”

بعدين قالولنا انو مركز سرطان الأطفال بغطّي علاج علي كلياً. كيّفت! علي، صار يكمٌل علاجه على نفقة المركز بالتنسيق مع أطبائه بمستشفى الزهراء ونحن ارتحنا شوي. صار فينا نفكر بشي غير المرض والمصايب. صار فينا ما نفكّر من وين بدنا نجيب مصاري لنحصل على الأدوية. صار فينا نفكر بشي غير، صار فينا نرجع نبتسم.
“صار فينا نرجع نشتريله لعلي الألعاب والكميونات يلي بحبها.

ما في شي ممكن يرجّع ابراهيم. بس ما بدي اخسر علي كمان!”

علي، واحد من 28 طفل اتصلوا فينا من 25 يوم لهلق، وعم يتلقوا الدعم من المركز بـ 8 مستشفيات مختلفة.
لأي طفل بعاني من السرطان بأي مستشفى كان، رجاءً الاتصال بالخط الساخن: 76.371717 والمركز بيتكفل بالعلاج بدون اي كلفة على الاهل والتنسيق التام مع الأطباء المعالجين.